58 கால்வாய் திட்டத்திற்காக வைகை அணையில் நீர் திறப்பு

தேனி மாவட்டத்தின், வைகை அணையில் இருந்து, உசிலம்பட்டி 58 கால்வாய் திட்டத்திற்கு திறக்கப்பட்ட தண்ணீர், தொட்டிப்பாலத்தை வந்தடைந்தது.

ஆசியாவிலேயே இரண்டாவது மிக நீளமான இந்த தொட்டிப்பாலம், திண்டுக்கல் மாவட்டம் வழியாக உத்தப்பநாயக்கனூர் வழி, சுமார் 22 கிலோ மீட்டர் தூரத்திற்கு நீரை கொண்டு செல்கிறது. தொட்டிப்பாலம் வழியாக உசிலம்பட்டி பகுதியில் உள்ள 33 கண்மாய்களுக்கு செல்லும் தண்ணீர், விவசாயத்திற்கு மட்டுமல்லாமல் குடிநீர் மற்றும் கால்நடை வளர்ப்பிற்கும் பயன்படுகிறது.

மதுரை மாவட்டம், உசிலம்பட்டியின் கனவு திட்டமான 58 கால்வாய் திட்டத்திற்கு, தண்ணீர் திறக்க கோரி, விவசாயிகள் வைத்த தொடர் கோரிக்கையின் அடிப்படையில், வைகை அணையிலிருந்து உசிலம்பட்டி 58 கால்வாய்க்கு தண்ணீர் திறக்கப்பட்டது.
இரண்டு ஆண்டுகளுக்கு பிறகு, வைகை அணையிலிருந்து உசிலம்பட்டி 58 கால்வாய்க்கு தண்ணீர் திறக்கப்பட்டு, உசிலம்பட்டி வந்தடைவது விவசாயிகள், பொது மக்களிடையே மகிழ்ச்சியை ஏற்படுத்தியுள்ளது.