உருவானது குறைந்த காற்றழுத்த தாழ்வுப்பகுதி; கன மழைக்கு வாய்ப்பு

குறைந்த காற்றழுத்த தாழ்வு பகுதி உருவான நிலையில், அடுத்த இரண்டு நாட்களில் வலுப்பெற வாய்ப்புள்ளதாக சென்னை வானிலை மையம் தெரிவித்துள்ளது.

இதுதொடர்பாக சென்னை மண்டல வானிலை மையம் வெளியிட்ட தகவல்:

இன்று காலை ஒடிசா கடலோரப் பகுதிகளுக்கு அப்பால் உள்ள வடமேற்கு வங்கக்கடல் பகுதிகளில், ஒரு காற்றழுத்த தாழ்வு பகுதி உருவாகியுள்ளது.

இது, மேற்கு - வடமேற்கு திசையில் நகர்ந்து, அடுத்த இரு தினங்களில் மேலும் வலுவடையக்கூடும்.

இதன் காரணமாக, தமிழகத்தில் ஓரிரு இடங்களிலும், புதுச்சேரி, காரைக்கால் பகுதிகளிலும் இன்று இடி, மின்னலுடன் கூடிய லேசானது முதல் மிதமான மழை பெய்யக்கூடும்.

ஓரிரு இடங்களில் பலத்த தரைக்காற்று மணிக்கு 40 முதல் 50 கிமீ் வேகத்தில் வீசக்கூடும்.

தமிழகத்தில் ஓரிரு இடங்களிலும், புதுச்சேரி மற்றும் காரைக்கால் பகுதிகளிலும் நாளை இடி, மின்னலுடன் கூடிய லேசானது முதல் மிதமான மழை பெய்யக்கூடும்.

குறிப்பாக, நீலகிரி மற்றும் கோவை மாவட்ட மலைப்பகுதிகளில் வரும் 28, 29ஆம் தேதிகளில் ஓரிரு இடங்களில் கனமழை பெய்யவும் வாய்ப்புள்ளது.

இவ்வாறு வானிலை மையம் தெரிவித்துள்ளது.