தவெக தொண்டர்களுக்கு விஜய் கடிதம்... மாற்று சக்தி அல்ல, முதன்மை சக்தி: விஜய் உறுதி

மதுரையில், தவெக மாநாட்டிற்கு முழுவீச்சில் தயாராகி வரும் நிலையில், தொண்டர்களுக்கு கடிதம் எழுதி உள்ள த.வெ.க. தலைவர் விஜய், முதன்மை சக்தி நாம் என்று உலகிற்கு மீண்டும் உணர்த்துவோம் என்று தெரிவித்துள்ளார்.

அவரது கடிதத்தில் கூறி இருப்பதாவது:

நம்மோட அரசியல் பயணத்துல அடுத்தடுத்த கட்டங்களை தாண்டி வர்றோம். இடையில் எத்தனை சவால், நெருக்கடி வந்தாலும் எல்லாத்தையும் மக்கள் சக்தியோட, அதாவது உங்க ஆதரவால கடவுளோட அருளால் கடந்து வந்துகிட்டே இருக்கோம்…

வர்ற 2026 சட்டமன்றத் தேர்தலுக்கு நாம முழு வீச்சுல தயாராகிட்டு வர்றோம்… இந்த சூழல்ல நம்மோட இரண்டாவது மாநில மாநாட்டை ஆகஸ்ட் 21 வியாழக்கிழமை மதுரையில நாம நடத்த இருக்கிறது உங்க எல்லாருக்கும் தெரிஞ்சது தான்…

முத்தமிழையும் சங்கம் வச்சு வளர்த்த மதுரையில், நம்ம கொள்கை எதிரியையும், அரசியல் எதிரியையும் சமரசமே இல்லாம எதிர்த்து நின்னு, ஜனநாயகப் போர்ல அவங்கள வென்று தமிழ்நாட்டு மக்களுக்கான நல்லாட்சிய நிறுவுவதே நம்ம குறிக்கோள் என்ற நிலைப்பாட்டை உறுதி செய்யறது தான் இந்த மாநாடு.

அதனால தான், ’வைகை மண்ணில் நடக்கும் இந்த மாநாடு, வாகை சூடும் வரலாறு திரும்புகிறது, வெற்றிப் பேரணியில் தமிழ்நாடு’ என்ற தேர்தல் அரசியல் மையக்கருத்தை முன் வச்சி நடக்க இருக்குதுன்னு உங்களோட பகிர்ந்துக்கிறதுல ரொம்ப மகிழ்ச்சி…

மாநிலம் அதிர மாநாட்டிற்குத் தயாராவோம். மாற்று சக்தி நாமன்று. முதன்மை சக்தி நாம் என்பதை உலகிற்கு மீண்டும் உணர்த்துவோம். நல்லதே நடக்கும். வெற்றி நிச்சயம்.

இவ்வாறு தவெக தலைவர் விஜய் தெரிவித்துள்ளார்.