ஸ்டார்லிங்க் செயற்கைக்கோள் இணைய சேவையை இந்தியாவில் தொடங்கும் விவகாரத்தில், ரிலையன்ஸ் தலைவர் முகேஷ் அம்பானியை நேரடியாகக் கேள்விக்கு உட்படுத்தியிருக்கிறார், எலான் மஸ்க். இந்தியாவில் ஸ்டார்லிங்க் நுழைவதற்கு அம்பானி தடையாக இருக்கிறாரா? அல்லது பாதுகாப்பு நடைமுறைகள் காரணமா?

பல ஆண்டுகளாக நீளும் காத்திருப்பு

ஸ்டார்லிங்கின் இந்திய வருகை குறித்த விவாதம் புதிதல்ல. 2021ஆம் ஆண்டிலேயே இந்தியாவில் முன்பதிவுகளை மேற்கொண்டது ஸ்டார்லிங்க். தேவையான உரிமங்களைப் பெறுவதற்கு முன்பாகச் சேவைகளை முன்பதிவு செய்வதாகக் கூறி, அந்நிறுவனத்தின் நடவடிக்கைகளை நிறுத்துமாறு மத்திய அரசு அறிவுறுத்தியது. வெளிநாட்டு செயற்கைக்கோள் நிறுவனங்கள் இந்தியாவின் தரவு மற்றும் தகவல் தொடர்பு பாதுகாப்பு விதிகளை எவ்வாறு பின்பற்றும் என்பதும் அரசின் கவலைகளில் ஒன்றாக உள்ளது.

எனவே, ஸ்டார்லிங்க்கிற்கு தொலைதொடர்பு உரிமங்கள் வழங்கப்பட்டிருந்தாலும், வணிக ரீதியிலான சேவையைத் தொடங்குவதற்குத் தேவையான பாதுகாப்பு நடைமுறைகள் மற்றும் அலைக்கற்றை தொடர்பான ஒப்புதல்கள் இன்னும் வழங்கப்படவில்லை.

“அம்பானிதான் இந்தியாவின் முதலாளியா?”

இந்தியாவில் தனது ஸ்டார்லிங்க் சேவையைத் தொடங்குவதற்கு தடைகள் ஏற்படுத்தப்படுவதாக எலான் மஸ்க் குற்றம் சாட்டியுள்ளார்.

“ஸ்டார்லிங்க் 165க்கும் மேற்பட்ட நாடுகளில் உரிமம் பெற்றுச் செயல்படுகிறது. இந்திய அரசின் ஒவ்வொரு சட்டத்துக்கும் தேவைக்கும் இணங்க ஐந்து ஆண்டுகளாக முயன்று வருகிறோம். அப்படியிருக்க, இன்னும் ஏன் உரிமம் கிடைக்கவில்லை? அம்பானிதான் இந்தியாவின் உண்மையான முதலாளியா?” என்று எக்ஸ் தளத்தில் எலான் மஸ்க் கேள்வி எழுப்பினார்.

எலான் மஸ்க்கின் கேள்வி

“அன்புள்ள பிரதமர் அம்பானி அவர்களே, இந்தியாவின் உண்மையான முதலாளி நீங்கள்தான் என்பதை உணராமல் போனதற்கு எனது பணிவான மன்னிப்புகளை ஏற்றுக் கொள்ளுங்கள்,” என்று கிண்டல் செய்து உள்ளார். ரிலையன்ஸ் குழுமத்துடன் தொடர்புடைய நிறுவனங்கள் பாஜகவுக்கு அளித்த அரசியல் நிதி குறித்த செய்திகளின் படங்களையும் அவர் எக்ஸ் தளத்தில் பகிர்ந்தார்.

மத்திய அரசின் மறுப்பு: பாதுகாப்பு நடைமுறை தான் காரணமா?

மஸ்க்கின் குற்றச்சாட்டுக்கு பதிலளித்த மத்திய தகவல் தொடர்பு அமைச்சகம், செயற்கைக்கோள் தகவல் தொடர்பு சேவைகளுக்கான இந்தியாவின் உரிமம் வழங்கும் நடைமுறை நியாயமானது; எந்த நிறுவனத்துக்கும் பாரபட்சம் காட்டப்படுவதில்லை என்று தெரிவித்தது.

ஸ்டார்லிங்க் மட்டுமல்லாமல், ரிலையன்ஸ் ஜியோவின் செயற்கைக்கோள் சேவைப் பிரிவும், பார்தி குழுமத்தின் ஆதரவு பெற்ற ஒன்வெப்பும் பாதுகாப்பு மதிப்பீட்டுக்கு உட்படுத்தப்பட்டுள்ளதாக அரசு கூறியது. மூன்று நிறுவனங்களும் ஏறத்தாழ ஒரே ஒழுங்குமுறை நிலையில்தான் இருப்பதாகவும், பாதுகாப்பு தொடர்பான நடைமுறைகள் முடிந்த பிறகே அடுத்தகட்ட அலைக்கற்றை ஒதுக்கீட்டுக்குச் செல்ல முடியும் என்றும் விளக்கியது.

இந்தியாவில் எந்தத் துறையிலும் ஏகபோக ஆதிக்கத்தை அரசு அனுமதிப்பதில்லை, நுகர்வோர் தங்களுக்கு விருப்பமான சேவையைத் தேர்ந்தெடுப்பதே முக்கியம் என்று மத்திய தகவல் தொடர்பு அமைச்சர் ஜோதிராதித்ய சிந்தியா அக்டோபர் 9ஆம் தேதி தெரிவித்தார்.

ஸ்டார்லிங்க் வந்தால் அம்பானியின் தொழில் அழிந்துவிடாது - எலான் மஸ்க்

இந்தியத் தொலைத்தொடர்பு சந்தையில் ரிலையன்ஸ் ஜியோ முக்கியப் பங்கு வகிக்கிறது. கோடிக்கணக்கான வாடிக்கையாளர்களைக் கொண்ட அதன் வணிக நலன்கள், செயற்கைக்கோள் இணையச் சந்தையின் வளர்ச்சியாலும் பாதிக்கப்படலாம்.

அதே நேரத்தில், ஜியோவின் செயற்கைக்கோள் சேவைத் திட்டமும் அரசின் ஒப்புதலுக்காகக் காத்திருக்கிறது.

இந்த பின்னணியில் ஸ்டார்லிங்க் இந்தியாவுக்கு வந்தால் அம்பானியின் தொழில் அழிந்துவிடும் என்ற அவரது ஆதரவாளர்கள் வாதம் அபத்தமானது, போட்டியால் அம்பானியின் லாபம் குறைந்தாலும் அவர் தொழிலை இழந்துவிட மாட்டார் என்று அக்டோபர் 11 அன்று மஸ்க் மீண்டும் விமர்சனக் கணையை வீசினார்.

ஸ்டார்லிங்க் இந்தியாவில் தடுக்கப்படுகிறதா? என்ற கேள்விக்கு இப்போதைய நிலையை மட்டும் வைத்து உறுதியான பதில் அளிக்க முடியாது. ஆனால், ஒரு புதிய போட்டியாளர் சந்தையில் நுழையும்போது பாதுகாப்பு விதிமுறைகளும் பெருநிறுவனங்களின் வணிக நலன்களும் எவ்வாறு செயல்படுகின்றன என்பதை வெளிப்படையாக ஆராய வேண்டிய அவசியம் உள்ளது.

Related Link

மனித மூளையின் ரகசியங்களைத் தேடும் அறிவியல் திட்டம்