அசாம் மாநிலத்தில் ஆட்சி அமைக்கிறது பாஜக

அசாம் மாநிலத்தில் 3ஆவது முறையாக ஆட்சி அமைக்கிறது பாஜக

அசாம் மாநிலத்தில் அமோக வெற்றிபெற்ற பாஜக, தொடர்ந்து 3-வது முறையாக ஆட்சியை தக்கவைத்துள்ளது.

Published on:

05 May 2026, 10:48 am

102 இடங்களில் அமோக வெற்றி
மொத்தமுள்ள 126 தொகுதிகளில் பாஜக மட்டும் 82 இடங்களில் வெற்றிபெற்று தனிப்பெரும்பான்மையுடன் ஆட்சி அமைக்கிறது. மேலும், அதன் கூட்டணி கட்சிகளான போடோலாந்து மக்கள் முன்னணி, அசாம் கண பரிஷித் ஆகிய கட்சிகள் தலா 10 இடங்களில் வெற்றி பெற்றுள்ளன. தவிர, காங்கிரஸ் கட்சி 19 இடங்களிலும், அனைத்திந்திய ஐக்கிய ஜனநாயக முன்னணி, ரைஜோர் தளம் ஆகிய கட்சிகள் தலா 2 இடங்களிலும், திரிணாமுல் காங்கிரஸ் ஒரு இடத்திலும் வெற்றி பெற்றுள்ளன.

பாஜக ஹாட்ரிக் வெற்றி
அசாம் மாநில சட்டப்பேரவைத் தேர்தலில் பாஜக தலைமையிலான கூட்டணி ஹாட்ரிக் வெற்றி பெற்று சாதனை படைத்தது. ஹிமந்த பிஸ்வா சர்மா 2ஆவது முறையாக முதல்வராக பொறுப்பேற்க உள்ளார்.
அசாம் மாநிலத்தில், 126 சட்டப்பேரவைத் தொகுதிகள் உள்ளன. 2016ஆம் ஆண்டு பாஜக முதல் முறையாக ஆட்சியைப் பிடித்தது. அப்போது சர்வானந்த சோனோவால் முதல்வர் ஆனார். 2021ஆம் ஆண்டில் நடைபெற்ற தேர்தலில் பாஜக 2ஆவது முறையாக ஆட்சியைப் பிடித்த போது, ஹிமந்த பிஸ்வா சர்மா முதல்வரானார்.

ஒரே கட்டமாக தேர்தல்
கடந்த ஏப்ரல் 9ஆம் தேதி அசாமில் ஒரே கட்டமாக தேர்தல் நடைபெற்றது. இதில் ஆளும் பாஜக, அசாம் கனபரிஷத் மற்றும் போடோ மக்கள் முன்னணி ஆகிய கட்சிகள் அடங்கிய தேசிய ஜனநாயகக் கூட்டணி - என்டிஏ போட்டியிட்டது. காங்கிரஸ் தலைமையிலான கூட்டணியில் ராய்ஜோர் தளம், ஏஜெபி, சிபிஐ-எம், ஏபிஹெச்எல்சி மற்றும் சிபிஐ-எம்எல் ஆகிய கட்சிகள் போட்டியிட்டன. இதுதவிர அனைத்து இந்திய ஜனநாயக முன்னணியான ஏஐயுடிஎப் தனியாக போட்டியிட்டது.

ஹிமந்த பிஸ்வா சர்மா முதல்வர்
அசாமில் ஆட்சியை பிடிக்க 64 இடங்கள் தேவை. ஆளும் பாஜக தலைமையிலான என்டிஏ கூட்டணி 102 தொகுதிகளில் வெற்றி பெற்றது. இதில் பாஜக 82, போடோலாந்து மக்கள் முன்னணி 10, அசாம் கனபரிஷத் 10 இடங்களில் வெற்றி பெற்றது. இந்த கூட்டணி தொடர்ந்து 3ஆவது முறையாக ஹாட்ரிக் வெற்றி பெற்றுள்ளது.

ஹிமந்த பிஸ்வா சர்மா 2ஆவது முறையாக முதல்வராக பொறுப்பேற்பார் என்று எதிர்பார்க்கப்படுகிறது. காங்கிரஸ் தலைமையிலான எதிர்க்கட்சிகளின் கூட்டணி 21 இடங்களிலும் ஏஐயுடிஎப் 2 இடங்களிலும் திரிணமூல் காங்கிரஸ் கட்சி ஒரு இடத்திலும் வெற்றி பெற்றது.