சிறையில் திராவிடமணி உயிரிழந்ததாக வரும் செய்தி.. அதிர்ச்சியளிப்பதாக எதிர்க்கட்சித் தலைவர் இபிஎஸ் கருத்து

திருச்சி மாவட்டம் பழூரைச் சேர்ந்த திராவிடமணி என்பவர், திருச்சி மத்திய சிறையில் உயிரிழந்ததாக வரும் செய்தி அதிர்ச்சியளிப்பதாக எதிர்க்கட்சித் தலைவர் எடப்பாடி பழனிசாமி தெரிவித்துள்ளார்.

இதுதொடர்பான அவரது எக்ஸ் பதிவில், திமுக ஆட்சியில் காவல் நிலைய மரணங்கள் என்பது தொடர்கதையாகிவிட்டதாக விமர்சித்துள்ளார்.

உயிரிழந்த திராவிடமணியின் குடும்பத்தாருக்கு இழப்பீடு வழங்கவும், அவரது மரணம் குறித்த உண்மைக் காரணத்தைக் கண்டறிந்து, தொடர்புள்ளோர் மீது உரிய நடவடிக்கை எடுக்க வேண்டும் என்றும் தெரிவித்துள்ள அவர், இனி இது போன்ற சம்பவங்கள் நிகழாவண்ணம் உறுதிசெய்யுமாறு முதலமைச்சரை வலியுறுத்துவதாகவும் குறிப்பிட்டுள்ளார்.