தவெக தலைவர் விஜய்யின் அரசியல் செல்வாக்கு ஆட்சி அதிகாரமாக மாறிய பிறகு, அவரது அரசு எப்படி செயல்படும் என்ற எதிர்பார்ப்பும் சந்தேகமும் ஒருசேர நிலவின. நிர்வாக அனுபவமின்மை, நிதி நெருக்கடி, கொள்கை முடிவுகளில் குழப்பம் எனப் பல விமர்சனங்கள் இருந்தாலும், ஆறு மாதங்களுக்குப் பிறகு பொதுமக்களிடம் தவெக அரசு நன்மதிப்பைப் பெற்றுள்ளதையே பொதுமக்கள் மத்தியில் நிலவும் கருத்துகள் காட்டுகின்றன.
தமிழக அரசியலில் நீண்டகாலமாக ஆதிக்கம் செலுத்தி வந்த திமுக, அதிமுக ஆகிய கட்சிகளுக்கு மாற்றாக ஆட்சிக்கு வந்த தவெக, ஆறு மாதங்களை நிறைவு செய்திருக்கிறது. முதலமைச்சர் சி.ஜோசப் விஜய் பதவியேற்ற முதல் நாளிலேயே மாநிலத்தின் நிதிநிலை குறித்துப் பேசியபோது, முந்தைய அரசு கஜானாவை காலியாக விட்டுச் சென்றிருப்பதாக குறிப்பிட்டார்.
நிதி நெருக்கடியைச் சுட்டிக்காட்டிய முதலமைச்சர் விஜய், அதை நலத் திட்டங்களைச் செயல்படுத்துவதற்கான தடையாக மாற்றிக் கொள்ளவில்லை.
பள்ளி மாணவர்களுக்கான காலை உணவுத் திட்டத்தை விரிவுபடுத்துவது, அரசு மருத்துவமனைகளில் பிறக்கும் குழந்தைகளுக்குத் தங்க மோதிரம் வழங்குவது, தகுதியுள்ள பெண்களுக்கு திருமணச் சீராக எட்டு கிராம் தங்க நாணயம் மற்றும் பட்டுப் புடவை வழங்குவது, அரசுப் பேருந்துகளில் பெண்களுக்கான கட்டணமில்லா பயணத் திட்டத்தை விரிவுபடுத்தியது எனப் பல்வேறு நடவடிக்கைகளை அரசு மேற்கொண்டுள்ளது.
ஏற்கெனவே நடைமுறையில் இருந்த நலத்திட்டங்களைத் தொடர்வதுடன், புதிய வாக்குறுதிகளையும் நிறைவேற்றும் அரசாகத் தன்னை முன்னிறுத்திக் கொள்ள தவெக முயற்சிக்கிறது. குறிப்பாக, நிதி நெருக்கடி இருந்தபோதிலும் மக்கள் நலத்திட்டங்களைச் செயல்படுத்துவது பொதுமக்களிடம் வரவேற்பைப் பெற்றுள்ளது.
பெண்களுக்கான மாதாந்திர உதவித்தொகையை ரூ.2,500 ஆக உயர்த்துவது உள்ளிட்ட முக்கிய தேர்தல் வாக்குறுதிகளை தவெக அரசு நிறைவேற்றும் என்ற எதிர்பார்ப்பு நிலவுகிறது. இத்தகைய வாக்குறுதிகள் அரசின் மக்கள் செல்வாக்கைத் தீர்மானிப்பதில் முக்கியப் பங்கு வகிக்கும்.
தவெக அரசின் ஆறு மாத காலச் செயல்பாடுகளில் அதிகம் கவனத்தை ஈர்த்திருப்பது நிர்வாகத்தில் வெளிப்படைத்தன்மை குறித்த விவாதமாகும். அரசு நியமனங்கள், ஒப்பந்தங்கள், இடமாற்றங்கள், பொதுச் சேவைகள் ஆகியவற்றில் வெளிப்படைத்தன்மை உறுதிப்படுத்தப்பட்டுள்ளது. இதன் மூலம் ஊழல் குறிப்பிடத்தக்க அளவு குறைந்திருப்பதாக வெளியாகும் தகவல்கள் அரசுக்கு நற்பெயரை ஏற்படுத்தியுள்ளன.
முதல்வர் விஜய் நிர்வாகத்தின் மிகப்பெரிய பலமாக ஊழலை ஒழிப்பதற்கான உறுதியும் வெளிப்படைத்தன்மையும் இருப்பதாக அரசியல் பார்வையாளர்கள் தெரிவிக்கின்றனர். அதேநேரத்தில், தவெக அரசின் செயல்பாடுகள் அனைத்தும் பாராட்டுக்குரியவையாக இல்லை என்ற விமர்சனமும் உள்ளது. குறிப்பாக சட்டம்-ஒழுங்கு பிரச்சனைகளும் மின்சாரத் துறையில் அரசின் முடிவுகள் கடுமையான விமர்சனங்களைச் சந்தித்துள்ளன.
புதிய முதலீடுகளையும் தொழில் நிறுவனங்களையும் ஈர்க்கும் விவகாரத்தில் தவெக அரசு இதுவரை வலுவான செயல்திட்டத்தை முன்வைக்கவில்லை என்ற புகாரும் எழுந்துள்ளது.
அடுத்த ஆறு மாதங்கள்...
திமுக, அதிமுக ஆகிய இரு கட்சிகளின் நீண்டகால ஆட்சிக்குப் பிறகு மாற்றத்தை எதிர்பார்த்து தவெகவுக்கு மக்கள் வாய்ப்பளித்துள்ளனர். அந்த எதிர்பார்ப்பை கவர்ச்சித் திட்டங்களாலும் அரசியல் பிரச்சாரங்களாலும் மட்டும் நிறைவேற்ற முடியாது.
ஆட்சியின் அடுத்த ஆறு மாதங்கள், விஜய் தலைமையிலான அரசு நிர்வாகத்தில் மாற்றங்களை தொடருமா? அல்லது தேர்தல் வாக்குறுதிகளுக்கும் நடைமுறைச் சிக்கல்களுக்கும் இடையே சிக்கிக்கொள்ளுமா? என்பதைத் தீர்மானிக்கும் முக்கியமான காலமாக இருக்கும்.