

ஆனால், இந்த விலை சரிவை ஒரு சாதாரண சந்தை ஏற்ற இறக்கமாக மட்டும் பார்க்க முடியாது. சர்வதேச தங்கச் சந்தையில் ஏற்பட்டுள்ள மாற்றங்கள், அமெரிக்காவின் பணவியல் கொள்கை, டாலரின் வலிமை, கச்சா எண்ணெய் விலை ஆகியவை ஒன்றோடொன்று இணைந்து தங்கத்தின் விலையில் பாதிப்பை ஏற்படுத்துகின்றன. எனவே, தற்போதைய சரிவு எங்கே போய் நிற்கும்? என்பதுதான் இப்போது எழுந்துள்ள முக்கியமான கேள்வி.
இந்தியாவில் தங்கத்தின் விலை குறைவதற்கு சர்வதேச சந்தையில் ஏற்பட்டுள்ள விலை வீழ்ச்சி முக்கியக் காரணமாக உள்ளது. சர்வதேசச் சந்தையில் தங்கத்தின் விலை இந்த வாரத்தில் மட்டும் சுமார் 4.5 சதவீதம் சரிந்துள்ளது.
கடந்த ஜூன் மாதத்துக்குப் பிறகு ஏற்பட்டுள்ள மிகப்பெரிய வாராந்திரச் சரிவு இது. நவம்பர் 12ஆம் தேதி ஒரே நாளில் தங்கத்தின் விலை சுமார் 3 சதவீதம் வீழ்ச்சியடைந்து, ஓராண்டுக்கும் மேலான காலத்தில் இல்லாத அளவுக்குக் குறைந்தது. இந்த வீழ்ச்சிக்குப் பின்னால் முக்கியமாக அமெரிக்கப் பொருளாதாரச் சூழல் இருக்கிறது.
அமெரிக்காவில் பணவீக்கம் எதிர்பார்த்ததைவிட அதிகமாக இருப்பதால், அந்நாட்டு மத்திய வங்கியான பெடரல் ரிசர்வ் வட்டி விகிதங்களைக் குறைப்பதற்குப் பதிலாக மீண்டும் உயர்த்தக்கூடும் என்ற எதிர்பார்ப்பு உருவாகியுள்ளது.
வட்டி விகிதங்கள் அதிகரிக்கும்போது அமெரிக்க அரசுப் பத்திரங்கள் உள்ளிட்ட வட்டி வருவாய் தரும் முதலீடுகள் கவர்ச்சிகரமாகின்றன. ஆனால், வட்டி வருவாய் தராத தங்கத்தின் மீதான முதலீட்டு ஆர்வம் குறைகிறது. இதனால் முதலீட்டாளர்கள் தங்கத்தை விற்று வெளியேறுகின்றனர்.
அதேநேரத்தில், அமெரிக்க டாலரின் மதிப்பும் உயர்ந்துள்ளது. டாலரில் விலை நிர்ணயிக்கப்படும் தங்கம், டாலர் வலுப்பெறும்போது மற்ற நாட்டு முதலீட்டாளர்களுக்கு அதிக விலையுள்ளதாக மாறுகிறது. இதுவும் தங்கத்தின் விலையைச் சரியச் செய்கிறது.
மத்திய கிழக்கில் போர் பதற்றம் தணிவதற்கான நம்பிக்கை குறைந்திருப்பதும், கச்சா எண்ணெய் விலை உயர்வதும் இங்கு முக்கியமான முரண்பாட்டை உருவாக்கியுள்ளன. போர் பதற்றம் அதிகரித்தால் தங்கத்துக்கான பாதுகாப்பு முதலீட்டுத் தேவை அதிகரிக்க வேண்டும். ஆனால், எண்ணெய் விலை உயர்வு பணவீக்கத்தை அதிகரித்து, அமெரிக்க வட்டி விகிதங்கள் உயர்ந்த நிலையிலேயே நீடிக்கக் காரணமாகிறது.
இந்த இரண்டாவது தாக்கம் தற்போது தங்கத்தின் விலையில் அதிக அழுத்தத்தை ஏற்படுத்தியுள்ளது.
உலகத் தங்க கவுன்சிலின் (World Gold Council) கணிப்பின்படி, உலக நாடுகளின் மத்திய வங்கிகள் தொடர்ந்து தங்கத்தை வாங்கி வருகின்றன. தங்கப் பரிவர்த்தனை நிதிகளிலும் (Gold ETFs) முதலீடு அதிகரித்துள்ளது.
உலகப் பொருளாதார நிச்சயமற்ற தன்மை, பணவீக்க அச்சம், புவிசார் அரசியல் பதற்றம் ஆகியவை தங்கத்துக்கான முதலீட்டுத் தேவையைத் தொடர்ந்து அதிகரிக்கக்கூடும். இவை தங்கத்தின் விலை மேலும் சரிவதைத் தடுக்கும் காரணிகளாக உள்ளன.
இதற்கிடையே, நவம்பர் மாதத்தில் இந்தியாவில் தங்கத்தின் விலை ஒரு குறிப்பிட்ட வரம்புக்குள் ஏற்ற இறக்கத்துடன் இருக்கும் என்றும், சரிவுக்குப் பிறகு விலை நிலைபெறக்கூடும் என்றும் சில சந்தை ஆய்வாளர்கள் கணித்துள்ளனர்.
இங்கு கவனிக்க வேண்டிய விஷயம் என்னவென்றால், விலை மேலும் சரியலாம் என்று நிபுணர் கணிப்பது ஒரு சாத்தியக்கூறு தான்; உறுதியான முடிவு அல்ல. அதேவேளையில், தற்போதைய விலை வீழ்ச்சியால் தங்கம் மிக அதிகமாக விற்கப்பட்ட நிலையை (Oversold) எட்டியிருப்பதாகவும் வல்லுநர்கள் சுட்டிக் காட்டுகின்றனர். அதாவது, தொடர்ந்து விற்பனை நடைபெற்று வருவதால் குறுகிய காலத்தில் மீண்டும் விலை உயர்வதற்கான எதிர்வினையும் ஏற்படலாம்.
சர்வதேச சந்தையில் தங்கத்தின் விலை தொடர்ந்து சரிந்தால் இந்த நிலையை எட்டுவதற்கான வாய்ப்பு உள்ளது. அதேநேரத்தில், டாலரின் மதிப்பு, அமெரிக்க வட்டி விகிதக் கொள்கை, சர்வதேசப் பதற்றங்கள் ஆகியவை விலைப் போக்கை மாற்றக்கூடும். மேலும், இந்தியாவில் தங்கத்தின் விலை சர்வதேச விலையை மட்டுமல்லாமல், அமெரிக்க டாலருக்கு நிகரான இந்திய ரூபாயின் மதிப்பு, இறக்குமதி வரி உள்ளிட்ட காரணிகளையும் பொறுத்து அமைகிறது.
எனவே, ஒரு சவரன் தங்கம் ஒரு லட்சம் ரூபாய்க்கும் கீழே வருமா? என்பது அடுத்த சில நாட்களில் சர்வதேசச் சந்தையில் ஏற்படும் மாற்றங்களைப் பொறுத்தே அமையும்.
சர்வதேசச் சந்தையில் ஏற்கெனவே ஒரு வாரத்தில் 4.5 சதவீதம் சரிவு ஏற்பட்டுள்ளதைக் கணக்கில் கொண்டால், ஒரு சவரன் தங்கம் ஒரு லட்சம் ரூபாய்க்குக் கீழே வருவது சாத்தியமற்ற இலக்கு அல்ல.
ஆனால், சர்வதேசச் சந்தையில் ஏற்படும் சரிவு அதே விகிதத்தில் சென்னையின் சில்லறை விலையிலும் பிரதிபலிக்கும் என்று கருத முடியாது. அமெரிக்க டாலருக்கு நிகரான இந்திய ரூபாயின் மதிப்பு, இறக்குமதிச் செலவு, வரிகள், உள்நாட்டுச் சந்தையின் தேவை ஆகியவையும் இந்தியாவில் தங்கத்தின் விலையைத் தீர்மானிக்கின்றன.
உதாரணமாக, சர்வதேசச் சந்தையில் தங்கம் குறைந்தாலும் இந்திய ரூபாயின் மதிப்பு டாலருக்கு நிகராகச் சரிந்தால், அந்த விலை வீழ்ச்சியின் பலன் இந்திய நுகர்வோருக்குக் குறைவாகவே கிடைக்கும். மாறாக, சர்வதேச விலையும் குறைந்து, ரூபாயின் மதிப்பும் வலுவடைந்தால் உள்நாட்டில் தங்கத்தின் விலை இன்னும் வேகமாகக் குறையலாம்.
தற்போதைய சூழலில் நகை வாங்கத் திட்டமிட்டிருப்பவர்கள் ஒரு லட்சம் ரூபாய்க்குக் கீழே விலை வருமா? என்று மட்டும் காத்திருப்பதைவிட, தங்களுடைய தேவையின் அடிப்படையில் முடிவெடுப்பது நல்லது.
திருமணம் போன்ற தவிர்க்க முடியாத தேவைகளுக்கு வாங்க வேண்டியவர்கள் ஒரே நாளில் முழுத் தொகையையும் முதலீடு செய்வதற்குப் பதிலாகப் படிப்படியாக வாங்குவது விலை ஏற்ற இறக்கத்தின் அபாயத்தைக் குறைக்கலாம்.
முதலீட்டு நோக்கில் தங்கம் வாங்குபவர்கள் குறுகிய கால விலைச் சரிவையும் நீண்டகாலத் தேவையையும் தனித்தனியாகப் பார்க்க வேண்டும். ஏனெனில், தங்கம் பாதுகாப்பான முதலீடு என்று கருதப்பட்டாலும், அதன் விலையும் கடுமையான ஏற்ற இறக்கங்களுக்கு உட்பட்டதுதான்.