கள்ளக்குறிச்சி மாவட்டம் உளுந்தூர்பேட்டை பகுதியில் மதுவிலக்கு போலீஸார் பறிமுதல் செய்த மதுபாட்டில்கள் நீதிமன்ற உத்தரவின் பேரில் அழிக்கப்பட்டன. சுற்று வட்டார பகுதிகளில் உள்ள கிராமங்களில் கள்ளச்சந்தையில் விற்பனை செய்யப்பட்ட 10 லட்சத்து 80 ஆயிரம் ரூபாய் மதிப்புள்ள 7 ஆயிரத்து 200 மதுபாட்டில்களை மதுவிலக்கு அமலாக்கப்பிரிவு போலீஸார் பறிமுதல் செய்தனர். காலாவதியான இந்த மதுபாட்டில்களை அழிக்க நீதிமன்றம் உத்தரவிட்டதை தொடர்ந்து, நீதிமன்ற ஊழியர்கள் மற்றும் வருவாய்த்துறையினர் முன்னிலையில் கீரனூர் ஏரியில் பள்ளம் தோண்டி மதுவை ஊற்றி போலீஸார் அழித்தனர்.