திமுகவுக்கும் தவெகவுக்கும் இடையே தான் போட்டி என விஜய் கூறி வருவது குறித்த கேள்விக்கு, நோ கமெண்ட்ஸ் என பதிலளித்த முதலமைச்சர் மு.க.ஸ்டாலின், இணையத்தில் ஜனநாயகம் படம் லீக் ஆனது குறித்து தாம் பதில் சொல்ல வேண்டிய அவசியமில்லை என்றும் தெரிவித்தார்.

ராமநாதபுரத்தில் மு.க.ஸ்டாலின்
ராமநாதபுரம் மாவட்டத்தில் போட்டியிடும் திமுக வேட்பாளர்கள் ராமநாதபுரம் காதர்பாட்ஷா முத்துராமலிங்கம், பரமக்குடி கதிரவன், முதுகுளத்தூர் ராஜகண்ணப்பன், திருவாடானை காங்கிரஸ் வேட்பாளர் கருமாணிக்கம் ஆகியோரை ஆதரித்து, இன்று ஏப்ரல் 12ஆம் தேதி, பரமக்குடியில் மாலை 4 மணிக்கு, முதல்வர் மு.க.ஸ்டாலின் பிரச்சாரம் மேற்கொள்கிறார்.

பரமக்குடியில் நடை பயிற்சி, வாக்கு சேகரிப்பு
சிவகங்கை மாவட்டம் திருப்பத்தூரில் பிரச்சாரத்தை முடித்துக் கொண்டு பரமக்குடியில் உள்ள தனியார் மஹாலில் முதல்வர் தங்கினார். இன்று காலை பரமக்குடியில் நடைபயிற்சி மேற்கொண்ட மு.க.ஸ்டாலின், பரமக்குடி தொகுதிக்கு உட்பட்ட பரமக்குடி காந்தி சிலை, பெரிய பஜார் பகுதிகளில் பொது மக்களிடமும், எமனேஸ்வரம் பகுதியில் பொது மக்களையும் சந்தித்து திமுக வேட்பாளருக்கு வாக்கு சேகரித்தார். முதல்வர் மு.க.ஸ்டாலின் உடன் பொது மக்கள் கைகுலுக்கி, செல்ஃபி, புத்தகங்களை வழங்கி மகிழ்ந்தனர்.

மக்கள் சந்திக்கிறார்கள்
அப்போது, முதல்வரும் திமுக தலைவருமான மு.க.ஸ்டாலின் கூறியதாவது;
நான் தினமும் நடப்பது வாக்காளர்களை சந்திப்பதற்காக இல்லை. எப்போதும் காலையில் நான் நடப்பேன். சென்னையில் இருந்தாலும் சரி, எந்த ஊருக்குப் போனாலும் சரி காலையில் நடப்பது, எனது வழக்கம். அப்போது நான் மக்களை சந்திக்கிறேன். தேர்தல் நேரமாக தற்போது இருப்பதால் நடை பயிற்சியின் போது மக்கள் வந்து என்னைச் சந்திக்கிறார்கள். உங்களுக்குத் தான் ஓட்டு என சொல்கிறார்கள். அது எனக்கு உற்சாகமாக உள்ளது. அதனால் நான் கொஞ்சம் கூடுதலாகவே நடக்கிறேன்.

இபிஎஸ் விரக்தி
எடப்பாடி பழனிச்சாமி தோல்வியினுடைய விரக்தியில் இருக்கிறார். அந்த விரக்தியில் திமுக தலைவர்கள் பற்றி அவதூறாக பேசி வருகிறார். தமிழ் நாட்டுக்கும் டெல்லிக்கும் தான் போட்டி என்று நான் கூறி வருவதற்கு காரணம். அதிமுகவின் முகமூடி போட்டு தானே பாஜக உள்ளே வருகிறது. அதனால் தான் அப்படி கூறுகிறேன். தமிழக அரசின் தலைமை செயலாளரை மாற்றி தேர்தல் ஆணையம் உத்தரவிட்டுள்ளது குறித்து, கண்டித்து அறிக்கை அளித்து உள்ளேன். மேலும் டி.ஆர். பாலு தேர்தல் ஆணையத்திடம் புகார் அளித்து உள்ளார்.

விஜய் குறித்த கேள்வி
நடிகர் விஜய் நடித்த ஜனநாயகன் திரைப்படத்தின் முக்கிய காட்சிகள் இணையதளங்களில் வெளியானதற்கும், நடிகர் விஜய் திமுகவிற்கும், தவெகவுக்கும் தான் போட்டி என்று கூறி வருகிறாரே? என்று கேட்டதற்கு, முதல்வர் மு.க.ஸ்டாலின், “நோ கமெண்ட்ஸ். அதைப் பற்றி நான் பதில் சொல்ல வேண்டிய அவசியம் இல்லை” என்றும் தெரிவித்தார்.

Related Link

பாஜகவுடன் கூட்டணி ஏன்? இபிஎஸ் விளக்கம்