மக்கள் தொகைக் கணக்கெடுப்பில் ஓ.பி.சி. மக்களின் சாதிப் பெயர்களை முன்கூட்டியே தயாரிக்கப்பட்ட பட்டியலில் இருந்து தேர்வு செய்யும் முறைக்குப் பதிலாக, கணக்கெடுப்பில் பங்கேற்பவர்கள் தங்களது சாதிப் பெயரைத் தாங்களே குறிப்பிடும் “open-ended” முறையைப் பயன்படுத்த மத்திய அரசு திட்டமிட்டுள்ளது. இந்த நடைமுறை சாதிவாரியான தரவுகளில் பெரும் குழப்பத்தை ஏற்படுத்தக்கூடும் என்று தமிழகத்தில் அரசியல் கட்சிகள் எதிர்ப்பு தெரிவித்துள்ளன. எனவே, பட்டியலினத்தவர் மற்றும் பழங்குடியினரின் சாதி விவரங்கள் பதிவு செய்யப்படும் முறையைப் போலவே, இதர பிற்படுத்தப்பட்டோர் (OBC) பிரிவினரின் சாதி விவரங்களையும் துல்லியமாகப் பதிவு செய்ய வேண்டும் என்று மத்திய அரசை வலியுறுத்தி தமிழக சட்டப்பேரவையில் தீர்மானம் நிறைவேற்றப்பட்டுள்ளது. ஏன் இந்த தீர்மானம்? ஓ.பி.சி. பட்டியலை ஏன் பயன்படுத்த வேண்டும்? மத்திய அரசின் விளக்கம் என்ன?

சாதிவாரிக் கணக்கெடுப்பு, சர்ச்சைக்குள்ளாகும் முறை
இந்தியாவில் கடைசியாக முழுமையான சாதிவாரி மக்கள் தொகைக் கணக்கெடுப்பு 1931ல் நடைபெற்றது. அதன் பின்னர், மக்கள் தொகை கணக்கெடுப்புகளில் பட்டியலினத்தவர் மற்றும் பழங்குடியினரின் எண்ணிக்கை தனியாகப் பதிவு செய்யப்பட்டாலும், ஓ.பி.சி. மக்களின் முழுமையான சாதிவாரி எண்ணிக்கை தொடர்ந்து கிடைக்கவில்லை.
2027 கணக்கெடுப்பில் சாதியும் சேர்க்கப்படும் என்று மத்திய அரசு அறிவித்திருப்பது இந்த நீண்டகால இடைவெளியை முடிவுக்கு கொண்டு வரும் என கருதப்பட்டது.

மீண்டும் குழப்பம்
ஆனால், ஒவ்வொருவரும் தங்களது சாதியின் பெயரைத் தனித்தனியாக எழுதும் முறையைப் பின்பற்றினால், ஒரே சமூகத்துக்குப் பல்வேறு பெயர்கள், அந்தப் பெயரையே வெவ்வேறு முறையில் எழுதுவது என்பதோடு உட்பிரிவுகள் மற்றும் உள்ளூர் பெயர்கள் பதிவாகும் வாய்ப்பு உள்ளது. இதனால் ஒரே சாதி பல சாதிகளாகக் கணக்கிடப்படும் அபாயம் உள்ளது. 2011 சமூக-பொருளாதார சாதிக் கணக்கெடுப்பில் 46 லட்சத்துக்கும் அதிகமான வெவ்வேறு சாதிப் பெயர்கள் பதிவானதாகக் கூறப்படும் நிலையில், இதே போன்ற குழப்பம் மீண்டும் ஏற்படக்கூடும் என்ற அச்சம் முன்வைக்கப்படுகிறது.

சட்டமன்ற தீர்மானம்: அடுத்த கட்டம் என்ன?
மத்திய அரசின் அதிகாரப்பூர்வ தேசிய ஓ.பி.சி. பட்டியலிலும் மாநில வாரியாக சாதிகள், உட்சாதிகள் மற்றும் சமூகங்களின் விவரங்கள் ஏற்கெனவே உள்ளன. தமிழக அரசின் பிற்படுத்தப்பட்டோர் மற்றும் மிகவும் பிற்படுத்தப்பட்டோர் பட்டியல்களும் உள்ளன. இவற்றை அடிப்படையாகக் கொண்டு கணக்கெடுப்பு மென்பொருளில் சாதிகளின் பட்டியலை இணைக்க வேண்டும் என்பதே தமிழகத்தின் முக்கிய கோரிக்கையாக உள்ளது.

மத்திய அரசின் விளக்கம்
மக்கள் தங்களது சாதியைத் தாங்களே எழுதுவதற்குப் பதிலாக, அதிகாரப்பூர்வமாக அங்கீகரிக்கப்பட்ட பட்டியலில் இருந்து தங்களது சாதியைத் தேர்வு செய்யும் வசதி வழங்கப்பட்டால், ஒரே சமூகத்துக்கான வெவ்வேறு பெயர்களால் ஏற்படும் குழப்பத்தை தவிர்க்க முடியும். ஆனால் ஓ.பி.சி. பட்டியலில் இடம் பெற்றுள்ள அனைத்தும் குறிப்பிட்ட சாதிகள் மட்டுமல்ல; சில சமூக மற்றும் தொழில்சார் பிரிவுகளும் அதில் இடம்பெற்றுள்ளதால், அந்தப் பட்டியலை நேரடியாக கணக்கெடுப்பில் பயன்படுத்துவதில் சிக்கல் இருப்பதாக மத்திய அரசின் தரப்பில் விளக்கம் அளிக்கப்பட்டுள்ளது.

ஓ.பி.சி. சமூகநீதியுடன் தொடர்புடைய விவகாரம்
தமிழக அரசியலில் சாதிவாரி கணக்கெடுப்பு என்பது வெறும் புள்ளிவிவர விவகாரம் அல்ல. அது இடஒதுக்கீடு, சமூகநீதி மற்றும் அரசின் நலத் திட்டங்களை எந்த அடிப்படையில் வடிவமைப்பது என்பதுடன் நேரடியாகத் தொடர்புடையது. ஓ.பி.சி. மக்களின் உண்மையான மக்கள் தொகை எவ்வளவு என்பது தெரியாமல், அவர்களுக்கான இடஒதுக்கீடு மற்றும் சமூகநலத் திட்டங்களின் தேவையை அறிவியல் ரீதியாக மதிப்பிடுவது கடினம். எனவே, கணக்கெடுப்பில் தரவு துல்லியம் மிக முக்கியமானதாகிறது. இதனால்தான், “சாதிவாரி கணக்கெடுப்பு நடத்துகிறோம்,” என்ற பெயரில் தரவு சேகரிக்கப்பட்டாலும், அதன் பின்னர் அந்தத் தரவை ஒருங்கிணைக்க முடியாத நிலை உருவாகக்கூடாது என்று தமிழக அரசு வலியுறுத்துகிறது.

ஒரே தரநிலை பதிவு முக்கியம்
தமிழக சட்டப்பேரவையின் தீர்மானம், இந்த விவகாரத்தை அரசியல் கோரிக்கை என்பதிலிருந்து மத்திய அரசிடம் முன்வைக்கப்படும் அதிகாரப்பூர்வமான மாநில நிலைப்பாடாக மாற்றுகிறது. சாதிவாரி மக்கள் தொகைக் கணக்கெடுப்பு என்பது வெறும் எண்ணிக்கையை சேகரிக்கும் நடவடிக்கையாக இல்லாமல், இந்தியாவின் எதிர்கால இட ஒதுக்கீடு, சமூகநலத் திட்டங்கள் மற்றும் சமூகநீதி கொள்கைகளுக்கான அடிப்படைத் தரவுகளாக மாற வேண்டுமானால், ஓ.பி.சி. மக்களின் சாதி விவரங்கள் குழப்பமின்றி, ஒரே தரநிலையில் பதிவு செய்யப்படுவது முக்கியமானதாகும்.

Related Link

சர்க்காரியா கமிஷன், 50 ஆண்டுக்கு பிறகு மீண்ட அரசியல் பூதம்