வங்கக்கடலில் புயல் உருவாகிறது என்றாலே கரையோர மாநிலங்களில் பதற்றம் தொற்றிக்கொள்கிறது. புயல் எச்சரிக்கை, கடலோர மக்களின் வெளியேற்றம், மீனவர்களுக்கான தடை, பேரிடர் மீட்புப் படையினரின் முன்னெச்சரிக்கை நடவடிக்கைகள் என சம்மந்தப்பட்ட மாநிலங்கள் பரபரப்பாகின்றன.
புயல்களை உருவாக்கும் வங்கக்கடல்
வங்கக்கடல் வெப்பமண்டலப் புயல்கள் உருவாவதற்கு ஏற்ற கடல் பகுதிகளில் ஒன்று. கடலின் மேற்பரப்பு வெப்பநிலை அதிகமாக இருக்கும்போது, கடலிலிருந்து வளிமண்டலத்துக்குச் செல்லும் நீராவியின் அளவும் அதிகரிக்கிறது. இந்த நீராவி மேலே சென்று குளிர்ந்து நீர்த்துளிகளாக மாறும்போது வெப்பம் வெளியிடப்படுகிறது. அந்த வெப்பம் புயலின் சுழற்சியை வலுப்படுத்த உதவுகிறது.
கடலில் காற்றழுத்தம் குறைவது, ஈரப்பதம் போதுமான அளவில் இருப்பது, வளிமண்டலத்தின் வெவ்வேறு உயரங்களில் வீசும் காற்றின் வேறுபாடு குறைவாக இருப்பது போன்ற சூழல்களும் புயல் உருவாவதற்கும் வலுப்பெறுவதற்கும் சாதகமாக அமைகின்றன.
ஆனால், வங்கக்கடலில் உருவாகும் எல்லாப் புயல்களும் ஒரே பாதையில் பயணிப்பதில்லை. சில புயல்கள் வடக்கு நோக்கி நகர்கின்றன; சில வடமேற்காக நகர்கின்றன; வேறு சில மேற்கு அல்லது தென்மேற்கு திசையில் நகர்ந்து தமிழகக் கடற்கரையை அடைகின்றன.
ஆந்திரா, ஒடிசாவுக்கு ஏன் அதிக முக்கியத்துவம்?
வங்கக்கடலின் மேற்குக் கரையில் தமிழ்நாடு, ஆந்திரப் பிரதேசம், ஒடிசா, மேற்கு வங்கம் ஆகிய மாநிலங்கள் அமைந்துள்ளன. இவற்றின் கடற்கரைகள் ஒரே திசையில் நீண்டிருந்தாலும், புயல்களின் பாதைகள் ஒரே மாதிரியாக இருப்பதில்லை. வங்கக்கடலின் மத்திய மற்றும் கிழக்குப் பகுதிகளில் உருவாகும் பல புயல்கள் ஆரம்பத்தில் மேற்கு அல்லது வடமேற்கு நோக்கி நகர்கின்றன.
பின்னர், நிலவும் காற்றோட்டத்தைப் பொறுத்து அவை வடக்கு அல்லது வடகிழக்கு நோக்கித் திரும்பலாம். குறிப்பாக, புயல்களை வழிநடத்தும் வளிமண்டலக் காற்றோட்டம் வடமேற்குத் திசையில் சாதகமாக இருக்கும்போது, ஆந்திரக் கடற்கரையை நோக்கிப் புயல்கள் நகரலாம்.
புயல் வடக்கு நோக்கித் திரும்பும்போது, ஒடிசா அல்லது மேற்கு வங்கக் கடற்கரையை நோக்கிச் செல்லவும் முடியும். இதனால் ஆந்திராவும் ஒடிசாவும் பல புயல்களின் பாதையில் இடம்பெறுகின்றன.
புயலின் பாதையை மாற்றுவது எது?
புயலைச் சுற்றியுள்ள வளிமண்டலக் காற்றோட்டமே அதன் நகர்வில் முக்கியப் பங்கு வகிக்கிறது. தமிழகக் கடற்கரைக்கு அருகில் உருவாகும் புயலுக்கும், வங்கக்கடலின் மத்திய அல்லது வடக்குப் பகுதியில் உருவாகும் புயலுக்கும் கரையை அடையும் பாதை வேறுபடும்.
எல்லாப் புயல்களும் ஒரே இடத்தில் உருவாவதில்லை என்பதால், அவை ஒரே மாநிலத்தை மட்டுமே குறிவைப்பதில்லை. வங்கக்கடலில் புயல்கள் உருவாகும் காலம், காற்றின் திசை, பருவக்காற்றின் தன்மை ஆகியவை அவற்றின் நகர்வைப் பாதிக்கின்றன. அக்டோபர், நவம்பர் மாதங்களில் வடகிழக்குப் பருவமழைக் காலம் தொடங்கும்போது வங்கக்கடலில் புயல் செயல்பாடுகள் அதிகரிக்கலாம். இந்தக் காலத்தில் உருவாகும் புயல்கள் தமிழ்நாடு உள்ளிட்ட கிழக்குக் கடற்கரை மாநிலங்களுக்குப் பாதிப்பை ஏற்படுத்தக்கூடும்.
புயல்களுக்குப் பாரபட்சம் கிடையாது: புள்ளிவிவரங்கள் சொல்வது என்ன?
இந்திய வானிலை ஆய்வுத் துறையின் (IMD) நீண்டகாலப் புள்ளி விவரங்கள், புயல்கள் எந்தக் கடற்கரையை அதிகம் அடைகின்றன என்பது பருவத்தைப் பொறுத்து மாறுகிறது என்பதைத் தெளிவுபடுத்துகின்றன.
வானிலை ஆய்வுத் துறையின் 1891–2025 காலகட்டப் பதிவுகளின்படி, வங்கக்கடல் புயல்கள் பொதுவாக அக்டோபரில் ஒடிசா–மேற்கு வங்கக் கடற்கரையையும், நவம்பரில் ஆந்திரக் கடற்கரையையும், டிசம்பரில் தமிழகக் கடற்கரையையும் அதிகம் தாக்குகின்றன. அதாவது ஆந்திரா, ஒடிசா மாநிலங்களில் மட்டுமே புயல்கள் கரையைக் கடப்பதில்லை; தமிழகமும் புயல்களின் முக்கியப் பாதையில் இருக்கிறது.
குறிப்பாக வடகிழக்குப் பருவமழைக் காலத்தில் வட தமிழகம், ஆந்திரக் கடற்கரை ஆகியவை குறிப்பிடத்தக்க புயல் அபாயத்தை எதிர்கொள்கின்றன. மேலும், இந்திய வானிலை ஆய்வுத் துறையின் ஆய்வுகளில், மிகத் தீவிரமான புயல்கள் ஒடிசா கடற்கரையில் கரையைக் கடக்கும் நிகழ்வுகள் அதிகமாகப் பதிவாகியுள்ளன. அதேவேளையில், தீவிரத்தைப் பொறுத்து புயல்கள் கரையைக் கடக்கும் மாநிலங்களின் வரிசையும் மாறுகிறது.
தமிழகத்தைப் புயல்கள் தவிர்த்துச் செல்கின்றனவா?
தமிழகத்தை நோக்கி வந்த புயல், கடைசி நேரத்தில் ஆந்திரா அல்லது ஒடிசாவை நோக்கித் திரும்பும்போது, தமிழகத்துக்குப் பெரிய பாதிப்பு ஏற்படாமல் போகலாம். இதற்குக் காரணம் புயலை வழிநடத்தும் காற்றோட்டத்தில் ஏற்படும் மாற்றங்கள்தான்.
வங்கக்கடலில் நவம்பர் மாதத்தில் உருவாகும் புயல்கள் இரண்டு வகையான பாதைகளைப் பின்பற்றலாம் என்று ஆய்வுகள் தெரிவிக்கின்றன. சில புயல்கள் வடமேற்கு நோக்கி நகர்ந்து தமிழ்நாடு, ஆந்திரா அல்லது ஒடிசா கடற்கரையை அடைகின்றன. வேறு சில புயல்கள் வடக்கு அல்லது வடகிழக்கு நோக்கித் திரும்பி மேற்கு வங்கம், வங்கதேசம் அல்லது மியான்மர் பகுதிகளை அடைகின்றன. இந்த வேறுபாட்டுக்கு வளிமண்டலத்தில் புயலை வழிநடத்தும் காற்றின் திசை முக்கியக் காரணமாகிறது.
அதாவது, தமிழகத்தைப் புயல்கள் திட்டமிட்டு விலக்கிவிடுவதில்லை. புயல் உருவான பிறகு நிலவும் வானிலைச் சூழல்தான் அதன் பயணத்தைத் தீர்மானிக்கிறது. அக்டோபரில் ஒடிசா, மேற்கு வங்கம்; நவம்பரில் ஆந்திரா; டிசம்பரில் தமிழ்நாடு எனப் பொதுவான பருவகாலப் போக்கு காணப்பட்டாலும், ஒவ்வோர் ஆண்டும் இதே வரிசை தொடரும் என்று உறுதியாகக் கூற முடியாது.
புயல்கள் எந்த மாநிலத்தையும் குறிவைப்பதில்லை. கடலின் வெப்பநிலை, வளிமண்டலக் காற்றோட்டம், காற்றழுத்த அமைப்புகள் ஆகியவையே அவற்றின் பாதையைத் தீர்மானிக்கின்றன.