அமெரிக்காவுடன் எந்த பேச்சுவார்த்தையும் நடத்தவில்லை

ஈரான் நாடாளுமன்ற சபாநாயகர் முகமது பாகர் காலிபாஃப் தகவல்

• அமெரிக்காவுடன் முடிவில்லாத போரையோ அல்லது நீடித்த பேச்சுவார்த்தைகளையோ நடத்தவில்லை என ஈரான் தெரிவித்துள்ளது. ஹோர்முஸ் நீரிணையில் கண்ணிவெடி வெடித்து கப்பல்கள் மூழ்கிய நிலையில், தொடர்ந்து நடைபெறும் தாக்குதல்களால் கடல் போக்குவரத்து பாதிக்கப்பட்டுள்ளது.

• இந்நிலையில், அமெரிக்கா பணியும் வரை தொடர்ந்து போராடுவோம் என ஈரானிய நாடாளுமன்ற சபாநாயகர் முகமது பாகர் காலிபாஃப் (Mohammad Bagher Ghalibaf) கூறியுள்ளார்.

சவுதியில் உள்ள அமெரிக்க ஊழியர்களுக்கு கடும் கட்டுப்பாடு

• சவூதி அரேபியாவின் விமான நிலையங்கள் மீதான தாக்குதல்களைத் தொடர்ந்து, அங்குள்ள தனது அரசு ஊழியர்களின் பயணங்களுக்கு அமெரிக்க தூதரகம் புதிய கட்டுப்பாடுகளை விதித்துள்ளது.

• சவூதியில் உள்ள எந்தவொரு விமான நிலையத்தையும் பயன்படுத்துவதற்கு முன்பாக தூதரக முதன்மை அதிகாரியிடம் முன் அனுமதி பெறுவது கட்டாயமாக்கப்பட்டுள்ளது. மேலும்,யேமன் எல்லையிலிருந்து 32 கிலோமீட்டர் தொலைவிற்குள் பயணிக்கவும் தடை விதிக்கப்பட்டுள்ளது.

ஹோர்முஸ் நீரிணையில் மூழ்கிய இரு கப்பல்கள்

• கடந்த 24 மணி நேரத்தில் ஹோர்முஸ் நீரிணைக்கு அருகே ஏவுகணை மற்றும் ட்ரோன் தாக்குதலுக்கு உள்ளான இரண்டு கப்பல்கள் அடுத்தடுத்து கடலில் மூழ்கின. சிங்கப்பூர் கொடியுடன் சென்ற ஜிஎஃப்எஸ் பிரைடு கப்பல் தாக்குதலுக்குள்ளாகி, தீப்பிடித்த நிலையில் மூழ்கியது.

• அந்தக் கப்பலில் இருந்த 21பணியாளர்களும் பாதுகாப்பாக வெளியேற்றப்பட்டனர். இதேபோல் கடந்த 23 ம் தேதி தாக்குதலுக்குள்ளான மற்றொரு கப்பலும் நீரில் மூழ்கியது.