பெற்ற குழந்தைகளுக்கு பாலில் விஷம் கலந்து கொடுத்து கொ* செய்த வழக்கில், குன்றத்தூர் அபிராமிக்கு ஜாமீன் வழங்க சென்னை உயர் நீதிமன்றம் மறுத்துவிட்டது.

’பிரியாணி’ அபிராமி...
காஞ்சிபுரம் மாவட்டம், குன்றத்தூரைச் சேர்ந்த விஜய் – அபிராமி தம்பதிக்குத் திருமணமாகி, நான்கு மற்றும் ஆறு வயதில் 2 குழந்தைகள் இருந்தனர். டிக்டாக்கில் பிரபலமான அபிராமிக்கு, அந்த பகுதியைச் சேர்ந்த பிரியாணிக் கடையில் பணியாற்றும் மீனாட்சி சுந்தரம் என்பவருடன் பழக்கம் ஏற்பட்டது.
திருமணம் தாண்டிய இந்த உறவுக்குத் தடையாக இருந்த தனது 2 குழந்தைகளுக்கும் கடந்த 2018ஆம் ஆண்டு பாலில் விஷம் வைத்து, அபிராமி கொ* செய்தார். பின்னர், மீனாட்சி சுந்தரத்துடன், கேரளா தப்பிச் செல்ல முயன்றபோது, இரண்டு பேரையும் காவல்துறையினர் கைது செய்தனர்.

சாகும்வரை சிறை
இந்த வழக்கை விசாரித்த காஞ்சிபுரம் மகிளா நீதிமன்றம், அபிராமி மற்றும் மீனாட்சி சுந்தரம் ஆகிய இருவருக்கும் சாகும் வரை சிறைத் தண்டனை விதித்து தீர்ப்பளித்தது. சிறப்பு நீதிமன்ற உத்தரவை ரத்து செய்யக் கோரியும், தண்டனையை நிறுத்தி வைத்து ஜாமீன் வழங்கக் கோரியும் அபிராமி சென்னை உயர் நீதிமன்றத்தில் மேல்முறையீடு செய்திருந்தார்.

உயர்நீதிமன்றத்தில் விசாரணை
இந்த மனு, நீதிபதிகள் என்.சதீஷ்குமார் - கே.ராஜசேகர் அமர்வில் விசாரணைக்கு வந்தது. அப்போது அபிராமி தரப்பில், ’குற்றச் சம்பவத்தில் மனுதாரரை தொடர்புபடுத்த எந்த நேரடி ஆதாரமும் இல்லை என்பதால், தண்டனையை நிறுத்தி வைத்து ஜாமீன் வழங்க வேண்டும்,’ என வாதிடப்பட்டது.

தகுதியான வழக்கல்ல
இந்த வாதத்தைக் கேட்ட நீதிபதிகள், ’வழக்கில் முதல் சாட்சியான அபிராமியின் கணவர் அளித்த சாட்சியத்தில், குழந்தைகளுக்கு கொடுத்த பால் கசப்பாக இருந்ததாகக் குறிப்பிட்டிருக்கிறார். வழக்கு ஆதாரங்களை பார்க்கும்போது, தற்போதைய நிலையில், தண்டனையை நிறுத்தி வைக்க தகுதியான வழக்கு இது அல்ல,’ எனக் கூறி, அபிராமியின் மனுவை தள்ளுபடி செய்து உத்தரவிட்டது. பிரதான மேல் முறையீட்டு வழக்கை நவம்பர் 4ஆம் தேதிக்கு நீதிபதிகள் ஒத்திவைத்தனர்.

Related Link

வீடியோ எடுத்த பெண் இன்ஸ்டா இன்புளூயன்சர், விரட்டி விரட்டி மிரட்டிய இளைஞர்கள்