நடப்பு ஐபிஎல் சீசனில், சன்ரைசர்ஸ் ஹைதராபாத் உடனான ஆட்டத்தில் இன்று மே 18ஆம் தேதி, சென்னை சூப்பர் கிங்ஸ் விளையாடுவது எதிர்பார்ப்பை எகிற வைத்து உள்ளது.

6ஆவது இடத்தில் சிஎஸ்கே
நடப்பு ஐபிஎல் போட்டிகளில், சிஎஸ்கே அணி இதுவரை 12 ஆட்டங்களில் விளையாடி, 6 வெற்றி உடன் புள்ளிப்பட்டியலில் 6ஆம் இடத்தில் இருக்கிறது. எஞ்சியுள்ள இரண்டு லீக் ஆட்டத்திலும் சிஎஸ்கே வெற்றி பெற வேண்டிய கட்டாயமும் உள்ளது. அப்போதுதான் அடுத்த சுற்றுக்கு சிஎஸ்கே முன்னேற்றம் காணும்.

CSK vs SRH
இந்த சீசனில், இன்று மே18ஆம் தேதி, சன்ரைசர்ஸ் ஹைதராபாத் உடனான ஆட்டம் சென்னை - சேப்பாக்கத்தில் நடைபெறுகிறது. இந்த சீசனில் சிஎஸ்கே அணி, சேப்பாக்கத்தில் விளையாடும் கடைசி ஆட்டம் இது.

அவர் வருவாரா?
சென்னை சூப்பர் கிங்ஸ் அணியின் முன்னாள் கேப்டனான தோனி, இந்த சீசனில் இதுவரை களம் காணவில்லை. அவருக்கு காலில் காயம் ஏற்பட்டதாக சிஎஸ்கே அணி நிர்வாகம் கூறி உள்ளது. துவக்கத்தில், 2 வார காலம் ஓய்வு தேவைப்படுவதாக கூறப்பட்டது. ஆனால், காயம் காலவரையின்றி நீடிக்கிறது. சில ஆட்டங்களுக்கு முந்தைய நாளன்று அணி வீரர்களுடன் பயிற்சி மேற்கொள்ளும் தோனி, போட்டி நடைபெறும் நாளன்று வருவது இல்லை.

தோனி கையில்...
சென்னை சூப்பர் கிங்ஸ் அணி விளையாடும் ஒவ்வொரு ஆட்டத்துக்கு முன்பும் தோனி விளையாடுவாரா? என்ற கேள்வி, எதிர்பார்ப்பை எகிற வைக்கிறது. பயிற்சியாளர்கள் முதல் சக வீரர்கள் வரை, தங்களுக்கு தெரியாது என்றே கூறி வருகின்றனர். அந்த வகையில் ஆடும் லெவனில் இடம்பெறும் முடிவு தோனியின் கைவசம் இருப்பதாகவே கூறப்படுகிறது.

வலு சேர்க்குமா சிஎஸ்கே?
சென்னை - சேப்பாக்கம் மைதானத்தில் சன்ரைசர்ஸ் ஹைதராபாத் உடன் நடைபெறும் இன்றைய ஆட்டம் தான் இந்த சீசனில் சிஎஸ்கே அணி விளையாடும் கடைசி ஆட்டம். அதனால் தோனி விளையாடுவாரா? என்ற எதிர்பார்ப்பு ரசிகர்கள் மத்தியில் பேசுபொருளாகி உள்ளது. இதற்கு வலு சேர்க்கும் வகையில், தோனியும் பயிற்சியில் ஈடுபட்டார். சுமார் 15 நிமிடங்கள் பேட்டிங் பயிற்சியில் தோனி கவனம் செலுத்தினார். தங்களுடன் தோனி பயிற்சி செய்வது, சிறந்த அனுபவமாக இருந்ததாக, சிஎஸ்கே பந்து வீச்சாளர் ஸ்பென்சர் ஜான்சன் கூறினார்.

சாம்பியன் பட்டம் வெல்ல வைத்தவர்
சர்வதேச கிரிக்கெட்டில் தோனியின் கடைசி ஆட்டம் 2019 உலகக் கோப்பை தொடரின் அரையிறுதி ஆட்டம் ஆகும். நியூசிலாந்து உடனான ஆட்டத்தில் 50 ரன்கள் எடுத்து ரன் அவுட் ஆனார் தோனி. கடந்த 2020ஆம் ஆண்டு சர்வதேச கிரிக்கெட்டில் இருந்து ஓய்வு பெறுவதாக தோனி பதிவிட்டிருந்தார். அதன் பின்னர், ஐபிஎல் போட்டிகளில் மட்டுமே தோனி விளையாடி வருகிறார். சர்வதேச கிரிக்கெட் ஓய்வுக்கு பிறகு 2021, 2023 சீசனில் சிஎஸ்கே அணியை, தோனி சாம்பியன் பட்டம் வெல்ல செய்தார். சிஎஸ்கே அணியின் கேப்டன் பொறுப்பை சக அணி வீரரிடம் ஒப்படைப்பதில் தோனி, மகிழ்ச்சி தெரிவித்தார். இப்போது, சிஎஸ்கே அணியை ருதுராஜ் கெய்க்வாட் கேப்டனாக வழிநடத்தி வருகிறார்.

சொன்னதை நிறைவேற்றுவாரா?
கடந்த 2021ஆம் ஆண்டில் சிஎஸ்கே அணி சாம்பியன் பட்டம் வென்ற போது சென்னையில் நடைபெற்ற வெற்றி விழாவில் பேசிய தோனி, தனது கடைசி ஆட்டம் சேப்பாக்கத்தில் தான் இருக்கும் என்றார். அந்த வகையில் இன்று நடைபெறும் ஆட்டம், தோனியின் ஆட்டமாக இருக்குமா? என்ற எதிர்பார்ப்பு சிஎஸ்கே, தோனி ரசிகர்கள் மத்தியில் எழுந்து உள்ளது. தோனி வர வேண்டும், இன்று வெல்ல வேண்டும் என்பதே அனைவரது எதிர்பார்ப்பு.

Related Link

ஐபிஎல் 2026 குஜராத் டைட்டன்ஸை 29 ரன்களில் வீழ்த்திய கொல்கத்தா